Sarong teleserye para sa Poland ginigibo sa CamSur animation studio

Luway luway na nagke-crear nin pangaran an Camarines Sur Animation Studio, na pig-mukna ni Gob. LRay Villafuerte, sa lado kan animation mantang nagdadakol an mga kumpanyang nag-pro-producir nin pelikulang animation sa lokal asin internasyonal an nag-mimirar kan kakayahan teknikal kaini kun kaya dagos nang nag-oofresir nin mga proyekto sa animation.

Kan nakalihis na Diciembre, an nasambit na studio an kinontrata kan sarong kumpanyang Aleman tanganing mag-gibo kan mga animation sequences para sa sarong teleseryeng inapod na “Tigerentebande” na nadadalan sa nacion kan Poland.
Kabaing kan full-length animation na pelikulang Dayo sa Mundo ng Elementalia na kadaklan na parte ginibo man sa CamSur Animation Studio asin nanggana nin apat na mayor na award sa Metro Manila Film Festival kan taon 2008, an istorya kaini an manunungod sa mga pakikipag-sapaladan ni Hannes na sarong aking lalaki, kan saiyang amigang si Lyka na sarong imbentor kaiba an iba pa nindang ka-tropa laban sa kontrabidang si Egon asin an tropa man kaini. An mag-amigong Hannes asin Lyka an igwa nin kawatan na kung apodon “tigerente” na saindang padangat na marhay.

Segun ki Benedicto Bernardino, an animation trainer kan Camarines Sur Animation Studio, an gabos na animation, clean ups asin in-between details kan nasambit na proyekto an pinag-crear kan mga lokal na animators na nag-adal sa irarom kan Gov.L-Ray 2D animation training program. Manonotaran na comparado sa enot kaining proyektong Dayo, an clean up asin in-between details sana an ginibo kan mga lokal na animators mantang mga animators gikan sa Manila an nag-crear kan animations.

Dugang pa niya, an saindang production area na igwa nin 25 state-of-the-art workstations kakabit an Cintiq Screen Tablets asin nag-gagamit kan pinaka-modernong teknolohiya sa animation na ToonBoom Pro software an nagkaka-igwa nin triple shift sa sarong aldaw tanganing maka-producir nin dae mababa sa 18,000 na mga drawings sa laog nin sarong bulan na palugit tanganing makabilog nin sarong episode para sa nasambit na teleserye nin tama sa panahon. Si Mr. Raul Mimay an animation director kan nasambit na proyekto digdi sa Pilipinas.

An nasambit na mga animators an binabayadan base sa lawig kan pelikulang saindang nagibo kun kaya dakula an pasasalamat kan mga ini mantang kadaklan sainda an dating mga out-of-school youth. Sinda nag-adal nin libre  para magin assistant animators asin natawan trabaho pagkatapos kan saindang pag-adal. Kan nakalihis na taon sinda nagdagos nin pag-adal como animators asin ngonian sinda na an magibo kan animation para sa Tigerentebande.

Segun man ki Armand Salva II, animation consultant and production manager, an animation training program an yaon na sa ika-11 grupo nin mga trainees asin ini minimidbid kan TESDA kun kaya igwang suportang pinansyal an mga trainees gikan sa TESDA asin man sa govierno provincial. Dugang pa niya an programa naka-producir na nin abot sa 300 na mga animators asin sagkod sa 60 por siento kan nasambit na bilang an nag-eempleo como animators sa manlaen laen na lokal asin internasyonal na animation outfits sa Metro Manila.  FERNANDEZ/MMEC

Comments (0)