Programa sa nutrisyon ni Gob. LRay padagos an implementasyon

Programa sa nutrisyon ni Gob. LRay padagos an implementasyon

Pili, CamSur.  Padagos na pigI-implementar ngonian kan govierno provincial an supplemental feeding sa irarom kan programang Nutri-Green na piglansar ni Gob. LRay sa katuyuhan na mapakarahay an nutrisyon kan mga kaakian digdi sa CamSur.

An supplemental feeding igwang duwang parte, an community-based na kun sain 33 mil na kaakian na nag-eedad saro hasta limang taon an target beneficiaries sa bilog na provincial, mientras an ikaduwa iyo an school milk feeding program kun sain singko mil na mga preschool asin grade one pupils  sa 44ng public schools  kan CamSur an benepisyario kaini.

An salud asin nutrisyon kan mga kaakian prayoridad na programa ni Gob. LRay magpoon pa kan siya nagtukaw bilang jefe ejecutivo kan provincia.

Nin huli kan mga epektibong programa ni Gob. LRay sa nutrisyon, an kaso nin malnutrisyon sa mga kaakian o underweight children sa CamSur buminaba na, base sa report kan National Nutrition Council.

Apuera kan masustansyang kakanon,  an mga mayor na komponente kan programang Nutri-Green iyo an pag establicir nin communal gardens na maserbeng paghahalean nin mga masustansyang gulayon asin pagtanom nin kahoy para sa preserbasyon kan kapalibutan.

An iba pang  elemento kan programa iyo an  nutri-eskwela asin pabasa sa nutrisyon na nagtutukdo sa mga magurang kan tamang pag-preparar kan masustansyang kakanon asin kalinigan o salud kan mga kaakian.  MMEC

Comments (0)