Pinakadakulang marathon gigibohon sa CamSur

PILI, CamSur – Mangayayari sa provincia nin Camarines Sur an pinakadakulang marathon sa Pilipinas na tatampukan nin mga pinakamatitibay na paradalagan sa enterong kinaban na pinangaranan Summit Water CamSur Marathon na gigibohon sa maaboton na Septiembre 26 sa Camarines Sur Watersports Complex (CWC).

An karerang ini na posibleng magin ika-duwang pinakadakulang daralagan sa Asia principalmenteng pinapadrinohan kan govierno provincial kan Camarines Sur sa irarom kan programa ni Gobernador LRay Villafuerte na gibohon an CamSur na sarong world-class tourism destination asin centro nin international extreme sports.

An CamSur iyo na ngonian an nangengenotan na provincia sa lado nin eco-tourism asin an international marathon na ini makakatabang na marhay sa pagmawot ni Gobernador LRay na i-tranformar man an provincia bilang sarong sports tourism destination.

Kakaiba an marathon na ini, an sabi ni Gobernador Villafuerte, ta an magigin ingreso kan okasyon mapapaduman sa kawang-gawa arog kan Gawad Kalinga na imbuwelto sa pagpakarhay kan pagbuhay nin kapobrehan, an National Kidney and Transplant Institute asin an KIDS Foundation na minatulod kan pagprotehir nin mga kaakian.

Mare-realisar an dakulang karawat na ini sa pakikipagtabangan kan Summit bilang title sponsor, Smart bilang presenting sponsor, suporta kan 100 Plus, Timex asin kan Philippine Star bilang media partner.

An marathon gigibohon sa anom na kategoriya, 3 K, 5 K, 10 K, 21 K, 42 K asin an Bayanihan Run kun sain an mga team na mabarali katabang man sa pagtipon nin fundo para sa kawang-gawa.

Labi pa ngani na duwang bulan bago mangyari an okasyon, sige-sige na ngonian an registration asin ribo-ribo na an nagpalista na mabarali sa daralagan.

Linalaoman ni Gobernador Villafuerte na maabot sa 20 mil an mabarali sa marathon o maglabi pa ngani.

Kaya imbitado an gabos na magbali sa okasyon na ini, dumalagan sa mga rotang maagi sa mga magagayon na lugar kan provincia, makipag-halobilo sa mga sikat na personalidad sa Pilipinas asin iba pang lugar, makatabang sa mga humanitarian causes asin puwede pang manggana nin darakulang premyo – mag-rehistro asin magbali sa Summit CamSur International Marathon, the Race to Rebuild a Nation.

Para sa iba pang detalye, mag-log on sana sa www.camsurmarathon.com. (GBCdlaveria/MMEC)

Comments (0)