PDCC CamSur nagtiripon katakod kan Bagyong Basyang

PILI, CamSur—Nagtiripon  an  mga  miembros  kan  Provincial  Disaster  Coordinating  Council (PDCC) ngonyan  na  Martes,  Hulyo  13  sa  Capitolyo  Provincial    en  koneksyon  kan mga  preparasyon   na  dapat   gibohon  katakod  kan  Bagyong  “Basyang”.

Si Bokal  Angel  Naval,  Chairman  kan  Committee  on   Disaster  Management,  iyo  an  naging  presiding  officer  kan sinambit   nang  tiripon.

Siring  sa  dati  an  kada  departamento  nagpreparar  kan  mga  dapat  gibohon  sa  panahon  na  igwa  nin  mga  magiging  biktima  kan  sinambit  nang  raot ning panahon  maski  ngani,  base  sa  report  kan  PAG-ASA,  dai  man  sentrong  aagihan  an  Camarines  Sur.

Saro  sa  mga  departamento  na  pirming  preparado  iyo  an  Department  of  Education (DepEd) mantang  sinda  an  nakatoka  na  maghanda  kan   mga  evacuation  centers.

An  Department  of  Public Works  and  Highways  (DPWH)   nagpreparar  kan  saindang  mga  ekipahe sa presente para sa  mga  pang-emerhensiyang  pangangaipo  kan  mga  namamanwaan.

An  PDCC, sa  pangengenot  kan  chairman  na  si  Gobernador  LRay  Villafuerte,  an  pirming   nakaantabay  sa  siring  na  mga  sitwasyon  tanganing  magtao  nin  asistensya  sa  mga  constituentes  na  nagiging  biktima  kan  mga  kalamidad  arog  kan  bagyo.

Nagkakapira  sa  mga  presenting  representantes  kan  kada opisina  an  nag-aratendir  kan  miting  iyo  an  DepEd, DPWH, PENRO, DILG, PNRC, DA, BFP.  Siring  man  sa  lado  kan  LGU CamSur  yaon  nagin  presente  an  PGSO, OPA-DAM, MMEC, PDPO, PTO, SP, asin an Budget Office.

Sa  panahon  nin  emerhensiya,  nag-asegurar  an PDCC  na  bukas  an  saindang  hotline (477-7063) asin ang hotline kan Philippine National Police (PNP-475-8680)   tanganing  mag-asistir  sa  mga  nanonongdan  na  mga namamanwaan  na  posibleng  maging  biktima  kan  Bagyong  Basyang  bilang  anticipacion  sa  raot  panahon.

Mientrastanto,  sa  kaparehong  tiripon  naintroducir  na  an  bagong  opisina  kan capitolyo  na   pinangaranan  “Environment, Disaster Management and  Emergency  Response  Office”  o EDMERO na  iyo  an  official  secretariat  kan  PDCC.   /  lagavino - mmec

Comments (0)