Manlain-lain na trabaho sa luwas kan nacion nakalap

Special Recruitment Activity iko-conducir sa Capitolio Provincial

Manlain-lain na trabaho sa luwas kan nacion an nakalap asin nakatalaan na i-ofresir kan govierno provincial sa paagi kan sarong Special Recruitment Activity (SRA) sa maabot na Enero 17 hasta 18, Martes asin Mierkules, sa lobby kan Capitolio Provincial na papamahalaan kan Camarines Sur Employment Center (CSEC).

Iyo ini an magayon na oportunidad na hatod kan govierno provincial sa pangengenot ni Gob. LRay Villafuerte sa pagbukas kan taon 2012 orog na duman sa mga nag-aaspirar na makakuang trabaho sa ibang nacion kun sain man mas marhay an ganar asin mga beneficios na pinago-ofresir.

Mientras tanto, padagos man an pagtaong asistensiya kan CSEC sa mga boot magtrabaho sa lado local.

An SRA na nasambit aktualmente iyo an pinaka-enot para sa taon 2012. Durante kan nasambit na aktibidad, nakatalaan na mag-conducir nin pre-qualification interview asin screening an mga representantes kan 1st Northern International Placement, Inc. tanganing makakalap nin mga aplikantes como Nurses sa Albany, New York, USA, mga household worker para sa nacion kan Kuwait, Qatar asin UAE, mga baby sitter, cleaner, driver para sa UAE asin mga houseboy para sa Qatar.

An mga nasambit na posisyon igwa nin maninigong kalipikasyon asin lawig nin ekperyensiya na hinahagad sa mga aplikantes sa lambang posisyon.

An mga interesado  kinakaipuhan  magpasiring sa CSEC dara an nagkapirang kopya kan saindang comprehensive resume na igwang detalyadong job description, school records, employment pati training certificates, NSO asin local copy kan Birth Certificate, NBI clearance, asin balidong pasaporte. Kaipuhan man nin mga litratong may sukol 2x2 asin 1x1,

Para sa mga dagdag na detalyes, puedeng apodan an CSEC sa mga numero 477-5858/477-7468 /4780109 asin 09198775952. An oficina kan CSEC makukua sa ika-duwang palapag kan Capitol Main Bldg sa Cadlan, Pili, Camarines Sur. Igwa man sinda nin e-mail address asin Facebook account na This e-mail address is being protected from spambots. You need JavaScript enabled to view it .  FERNANDEZ/MMEC

Comments (0)