Ika- tolong sesyon kan FFS sa Vegetable Production pigconducir sa Tinangis

PILI, CamSur—Pigconducir  na  an  ika-tolong  sesyon  kan  Farmers  Field  School  (FFS)  on  Vegetable Production na an katuyuhan iyo an pagtukdo kung papano an  tamang  pagproducir nin  marhay  na  klaseng  gulay, magpoon sa pagtanom sagkod sa gusihon an produkto na dai na kaipohan gamitan nin inorganic fertilizer o chemical insect repellant mientras  na padagos na napepreserbar pa an kapalibotan. Iyan naging tema kan  training  para sa  mga  paratanom nin  gulay  na  piggibo   sa  paagi  kan  inaapod  na  Farmers  Field  School (FFS)  duman  sa  Tinangis,  Pili. 

Sosog   sa  report  gikan  sa  Office  of   the  Provincial  Agriculturist (OPA), maabot  sa  50ng vegetable producers  an  nagparticipar  sa  training  na hali  man  sana  sa  sinambit  nang  barangay  asin  sa  OPA  na  invuelto  sa  programang  ‘Gulayan’,   na ginibo  kan  nakalihis  na  Biyernes,  Enero  29.
Obheto  kan sinambit  nang  ika-tolong   sesyon  kan  training  iyo  na  manodan  kan  mga participantes an mga pagproducir nin organic fertilizer  tanganing  mai-apply  sa  manlain–lain na  klaseng  gulay  asin an mga  bagong teknolohiya tanganing  maibitaran  asin  dagos  nang ma-eliminar  an  mga  peste  na  makokoa  asin  nag-eestar  sa  pananom. 

Nagconducir  nin  lecture  pagkaagang  Biyernes dapit sa   Natural  Farming  System, pagkahapon, nagconducir  nin  actuwal  na  pag-demonstrate sa pagproducir  nin  limang  klaseng  liquid  fertilizer  na  iyo  an  mga  minasunod:  FPJ - Fermented  Plant  Juice, FFJ - Fermented  Fruit  Juice,  FFA - Fish Amino  Acid,  IMO - Indigenous  Micro-organism, asin  OHN - Oriental  Herbal  Nutrient.  An sinambit  nang  mga  piggibong  fertilizer  an  puedeng  gibohon  na  dai  na  kaipohan  na  maggastos  nin  dakulang  kantidad  an  sarong  vegetable  grower. 

An  FFS  pigco-combinar  an lectures  asin  actuwal  field  demonstration  na   icoconducir sa  lugar  na  mismong  tatanoman  kan  mga  gulay  tanganing  praktikal  na  maiaplikar  an  mga  nanodan  base  sa mga   lectures.

An  sinambit  nang  actividad  saro  sa  mga  programa  na  padagos  na  pigsusuportahan   ni  Gobernador  LRay  Villafuerte  katakod  kan  saiyang  programang  agricultural  productivity  asin  an  magkaigwa  nin  marhay  na alternatibong  hanapbuhay  an  mga  contituentes  kan  provincia.

An  training    pinangengenotan  kan Govierno  Provincial  sa  paagi  kan    Office  of  the  Provincial  Agriculturist  (OPA)  sa  pakikipagtabangan  kan  Department  of  Agriculture  Regional  Field  Unit-5  asin  kan  Agricultural  Training  Institute (ATI).

An  mga  resource  speakers  iyo  an  Training  Management  Team kan  High  Value  Commercial  Crops ( HVCC)  kan  OPA.

Nagkakapira  sa  mga  gulay  na  pigtaranom sa  ika- duwang sesyon  kan  FFS  iyo   an    kamatis, pechay,  lettuce,  cucumber, asin  an  watermelon. / LAGavino  -MMEC

Comments (0)