Gob. LRay, ibang opisyales nagsurumpa sa puwesto

PILI, CamSur – Durante kan nakaagi niyang duwang turno, dakula an pig-progreso kan Camarines Sur hasta ini nagin nang competitive sa ibang provincia kan Pilipinas.   Naprobaran na ini poon kan taon 2004 hasta sa presente, alagad malalampasan pa kan provincia ngonian na paaboton na tolong taon kan saiyang ultimong turno an gabos na akumplisimiento kan CamSur kan nakalihis na anom na taon.

Iyo ini, sa madaling sabi, an mensaheng boot ipaabot asin ipinanuga ni Gobernador LRay Villafuerte sa mga konstituwentes durante kan pag-horar niya sa saiyang ika-tolo an ultimong turno bilang ejecutivo provincial na ginibo kan Miyerkules na aga, Hunyo 30 duman sa Convention Center kan Capitolyo Provincial sa barangay Cadlan, Pili.

Si Gobernador Villafuerte minakapot ngonian kan distinggidong honra bilang ika-duwa pa sanang gobernador kan Camarines na na-elihir nin tolong sunod-sunod na turno na iyo sana man an pinakalawig na tinutugot nin ley.  An pinakaenot na gobernador na na-elihir tolong beses iyo an saiyang ama na si Congressman Luis R. Villafuerte kan bagong ika-tolong distrito na iyo man an saiyang sinalidahan sa puwestong gobernador.

Si Gobernador Villafuerte pinasumpa ni RTC Branch 25 Presiding Judge Jaime E. Contreras.

Nag-horar man durante kan sinabing seremonyas sinda dating bise gobernador ngonian Deputado Salvio B. Fortuno kan ika-limang distrito asin an masalida saiyang elihidong Bise Gobernador Fortunato C. Peña na pig-administrar ninda RTC Judge Antonio Camillus Ayo asin Judge Freddie D. Balonzo.

Mga piling alkalde, bise alkalde asin mga konsehal sunod man na nag-surumpa sa atubangan ni Gobernador Villafuerte.

Sa halipot niyang mensahe pagkatapos manumpa, pigrokyaw ni Gobernador an dakul na maray-rahay na pagba-bago sa Camarines Sur na nangyari durante kan nakarilihis niyang turno arog baga kan pag-usbog kan provincia bilang most visited tourism destination sa nacion, pag-angat kaini hali sa ika-39 pasiring sa ika-sampulong pinakamayaman na provincia sa Pilipinas, an pagigin sarong bantugan na international sports center kan CamSur asin an pagigin saro sa mga pinakadakulang provincia sa nacion sa ngaran nin pag-producir nin paroy. 

Naglalaom ugaring si Gobernador Villafuerte na an CamSur lalo pang ma-asenso asin kayang-kaya pang malalampasan an gabos na akumplisimiento kan nakalihis na anom na taon ngonian na paaboton na tolong taon kan saiyang ultimong turno bako sana sa lado nin turismo pati pa man sa edukasyon, sports asin agrikultura.

Tinuyaw ni Bise Gobernador Ato Peña na na okasyon sarong “day of commitment and thanksgiving,” partikularment an pagtaong udok na pasalamat ki Gobernador Villafuerte, Deputado Villafuerte asin an enterong familia Villafuerte sa pag-anduyog sa saiya asin pag-talang na maguno an saiyang trayumpo sa vida politica.

Advocacia ni Bise Gobernador Peña na arogon an estilo ni Gobernador Villafuerte na saiyang inapod na “Christian and innovative leadership” sa saiyang pagpadalagan asin pagmanehar kan legislative.  “Habo ko man na mabistong sarong marhay na politico kundi gusto kung mabisto bilang marhay na bise gobernador,” an sabi ni Peña pagkatapos na i-presentar saiya an gavel ni Deputado Fortuno na minasimbulo kan saiyang pagkaka-presiding officer kan Sanggunian.

An mga miembro junta provincial na sunod na nagsurumpa iyo sin Bokal Warren A. Señar kan first district, Romulo O. Hernandez asin Darius S. Nopra kan second district, Angel G. Naval kan third district, Emmanuel F. Llaguno asin Rosito T. Velarde kan fourth district, asin sinda Rudito P. Espiritu Jr. asin Wilfredo Rex C. Oliva kan fifth district.

An nag-horar man na mga alkalde iyo sin Lilia Abarrientos kan Del Gallego, Nebb P. Santiago kan Cabusao, Salvador Señar kan Magarao, Fidel Carido kan Ocampo, Tomas Bongalonta kan Pili, Sandy Ondis kan Siruma, Solon Demetriou, Jr. kan Garchitorena, Artemio Lim kan Goa, Jeanette Bernaldez kan Bato, Rey Lacoste kan Buhi, Benjamin Decena kan Bula and Delia Simbulan kan Nabua.

Sunod na pina-horar ni Gobernador Villafuerte an mga bise alkalde asin konsehal asin ultimong nagtaong patara-tara si Deputado Fortuno na nagsabing sususteniran niya an dati niyang espuersos para sana makataong epektibong serbisyo sa saiyang mga konstituwentes. (GBClaveria/MMEC)

Comments (0)