Gob. LRay bisita sa Subic sa pagtiripon kan mga lideres sa kinaban nin turismo

Pili, CamSur—Dakulang onra na naman sa provincia nin CamSur kan si Gobernador LRay Villafuerte iyo an saro sa mga piling opisyal na naging resource speaker sa ginibong pagtiripon kan mga  sikat na lideres sa linya nin turismo hale man iba-ibang lugar kan Pilipinas asin kinaban na ginibo sa Subic Bay Exhibition and Convention Center kan nakaaging semana.

An conferencia na pig-apod na MICECON 2010 na pig-organizar kan Department of Tourism kaibahan an Philippine Convention and Visitors Corp. may katuyuhan na lalong pauswagon an turismo digde sa bilog na Pilipinas.
Si Gob. LRay dakol nang narecibeng awards pag-abot sa turismo por medio kan saiyang mga creative initiatives arog kan CWC o CamSur Watersports Complex na nagpasikat sa CamSur sa bilog na Pilipinas asin kinaban pag-abot sa extreme watersports.

An CamSur iyo an na gawadan nin award na “Top Destination of the Year” kan prestihiosong People Asia Magazine.

Sa nasambit na pagtiripon, an booth kan an CamSur  iyo an na-reconocer na pinakamagayon sa gabos na booth na naka-display duman sa Subic Center.  Naging mayor na tema kan booth kan provincia an mga magagayon retrato kan  CWC asin mga eksena sa Survivor series na ginibo kan mga man iba-ibang nacion  arog kan France,  Bulgaria, Serbia asin kan Israel sa mga magagayon na isla kan Caramoan. 

An MICE iyo an acronym na ang gustong sabihon Meetings, Incentive Travel, Conventions, Exhibitions and Events. (stn/mmec)

Comments (0)