CWC host kan pagbisita kan United Nations team sa CamSur

PILI, CamSur—Dakulang onra an naguno kan Camarines Sur kan an provincia iyo an pinili kan mga opisyales kan United Nations Development Programme (UNDP) na maging lugar para sa saindang taonan na team building activity o retreat kan nakalihis na semana. 

An UNDP sarong global network kan United Nations (UN) na an misyon iyo an makatabang sa mga naciones sa pag-resolver sa mga problema arog kan poverty, energy asin environment asin HIV/AIDS. 
An mga bisita ni Gob. LRay nag-arabot kan Mierkules pa, Pebrero 10 para sa tolong aldaw na aktividad na pinangenotan mismo ninda Jacqueline Badcock, UN resident coordinator asin UNDP resident representative asin ni Renaud Meyer, an country director.

Ginibo an nasambit na pagtiripon kan delegasyon sa world-class na Camarines Sur Watersports Complex o CWC kun sain saindang pig-orolayan an mga akomplicimiento kan nakaaging mga taon asin mission asin vision ninda digdi sa nacion kan Pilipinas.

Piglibot man kan mga bisita an Consocep resort kan provincia sa Mount Isarog.  Sa huring aldaw ninda, kan Pebrero 12,  pigtawan sindang bonggang entertainment kan govierno provincial mientras sinda nagdi-dinner sa poolside kan CWC.  An delegasyon nagbiyahe pabalik sa Metro Manila kan Sabado, pecha 13. mmec

Comments (0)