Corn planters liwat mataranom mais sa pagbungkaras kan taon 2010

Pili, Cam Sur—Preparado na an mga paratanom mais para sa sunod na  planting season mientras na kadaklan sa inda an  naggusi na kan saindang  mga pananom dai pa sana nahahaloy asin an iba pigtalaan man  na  maggusi  ngonyan na bulan kan Pebrero. 

Nagin marhay man an gusi kan mga paratanom mientras na dai man  inagihan nin raot panahon o makusog na bagyo an Camarines Sur kan mga  ultimong bulan kan nakalihis na taon.

Sosog sa report gikan sa Office of the Provincial Agriculturist (OPA),  Oktubre an naging ultimong bulan kan pagtanom kan  mga corn  planters  kan  taon 2009 asin an iba naghabol pa man kan bulan nin Nobyembre.

Pigtalaan man an taranoman ngonyan na bulan  kan  Pebrero  mantang  an iba mahabol pa sa  bulan  kan  Marso  na  kun  sain  an  iba  matanom  man  giraray nin OPV yellow corn seeds asin  an  iba planong  magtanom  nin  hybrid  na   variety  na  dai  na  aboton  nin  apat  na  bulan  an  paggusi.

Bolanos  man  na  pigsusuportahan  ni  Gobernador  LRay  Villafuerte  an  mga  programa  sa  ngaran  nin  mais  digdi  sa  provincia  mantang  gusto  kan  gobernador na maging aktibo an mga namamanwaan sa lado  nin  agrikultura,  na  sarong  paagi  na  makakatabang  sa  pag-uswag  kan pagbuhay  kan  mga namamanwaan lalo duman sa  mga  nakacolocar  sa  mga  hararayong  barangay tanganing maging suficiente an provincia sa ngaran nin  pagkakan.

Magiromdoman  na  kadaklan  kan  naitanom  kan  nakalihis  na  mga  bulan  iyo  an  OPV ( Open  Pollinated  Variety )  yellow  corn  seeds na  kun  sain  libreng  pigpanao  sa  mga  cluster  municipalities  kan  provincia.

Nagkakapira  sa  mga  lugar  na  mina-compuesto  kan corn cluster municipalities  iyo  an  mga  banwaan  kan  Calabanga, Pili,  Ocampo,  Sagnay, Tigaon, Goa, Lagonoy,  Baao,  Bula,  Buhi,  Sipocot,  Nabua,  asin  duwang  ciudad  na  iyo  an  Naga  asin  Iriga.

Obheto  kan  sinambit  nang pag-alokar nin mais na  libreng  naipanao  sa  mga  corn  planters  iyo  na  tanganing  itanom  sa   mga  bagong  lokasyon  na  puedeng  tanoman  kan  sinambit  nang  OPV yellow corn   seeds  na  gikan  pa  duman  sa  provincia  kan  Isabela. /  LAGavino -  MMEC

Comments (0)