CamSur waste management program nagrecebing suporta gikan sa dayuhan

An programa kan govierno provincial sa epektibong pagmanehar kan basura sa laog kan Capitolyo Provincial naka-recebi nin suporta en forma nin mga makinang panahi gikan sa dayuhan na grupo, an Foundation Heetens Helpgoodcenter Philippines, Inc. na naka-base sa Holland.

An mga nasambit na makina gagamiton sa pag-producir nin mga produkto arog kan folders, envelopes, bags, place mats asin table covers gikan sa mga sachet kan shampoo, coffee, juice asin iba pang pamatos na gibo sa kabaing na materyales.

Maroromdoman na namuknâ an ofecina kan Solid Waste Management Section – PGSO CamSur nin huli sa padagos na pagtulod kan advocacia kan govierno provincial, sa pangengenot ni Gobernador LRay Villafuerte, manungod sa pagtaong mahiwas na atensyon sa basura tanganing malikayan an maraot na epekto kaini sa kapalibutan partikularmente sa mga baha na puedeng mangyari nin huli kan mga baradong agihan kan tubig.

Sa lindong kan programa tinatawan atensyon an pagkolekta kan mga basura, particularmente idtong dai natutunaw dawa sa paglihis nin halawig na panahon, tanganing i-conventir an mga ini na maging mga produktong puedeng ipabakal asin pagkakakitaan o kaya liwat pakinabangan an ibang mga bagay gikan sa basura.

Kasunod kaini iyo man an pagpasar kan kursong Basic Solid Waste Management Training Program na puedeng alternatibong kurso imbes kan ROTC asin iba pang trainings, partikularmente sa laog kan provincia, sa lindong kan National Service Training Program na nakapalaman sa Acta Republika numerado 9163. An Southeast Asian Institute of Computer Technology (SeaICT) na pinagmamanehar kan govierno provincial an enot na nag-ofresir kan nasambit na kurso.

An Ecological Waste Management Class – (NSTP 1) kan SeaICT an recipiente kan duwang makina asin duwa man an itinao sa Capitol Multi-Purpose Cooperative.

Dagos man na matabang an dayuhan na donor sa pagbenta kan mga produkto sa internacional na mercado. Huli kaini, an halangkaw na kalidad kan mga produkto an ipinanuga kan mga recipiente.

An kikitaon sa lindong kan programa an itatagama sa orog pang pagpahiwas kaini particularmente sa pagbakal nin mga kagamitan asin dugang na mga basurahan. fernandez/anntuy/mmec

Comments (0)