CamSur kumpirmadong numero unong pan-turismong destinasyon sa Pilipinas

Nag-record nin 1.29 milyones na bisita kan 2009

An provincia nin Camarines Sur confirmado nang pinakasikat na destinasyon pan-turismo sa enterong Pilipinas na iyo an may pinakadakul na numero nin nagbirisita na uminabot sa labing 1.29 milyones na domestic asin dayuhan na turista kan nakalihis na taon 2009.

Ini segun sa report kan National Economic Development Authority na naglalaom pa ngani na an mga aktibidad pan-turismo lalo pang matingkad asin kinakarkulong ma-ingreso nin labi sa $17 billones ngonian na taon 2010.  Awad-awad na parte kaini mare-realisar por medyo kan mga turista sa Camarines Sur.
An baretang ini nakabandera sa sarong front-page story kan Manila Bulletin ngonian na aldaw.

An pan-nacional na ingreso hali sa turismo iyo na ngonian an pinakadakulang pinaghahalian nin foreign exchange asin minakumpuesto nin 13.6 por ciento kan GDP o gross domestic product.

An baretang ini mina-kumpirmar man na tamang-tama talaga, tayming na tayming asin nagereksakto an mga kaisipan asin inisyatibo ni Gobernador LRay Villafuerte na mag-invest sa mga proyektong pan-turismo digdi sa Camarines Sur.

Importanteng marhay an turismo sa economiya kan Pilipinas, pahayag ni NEDA director Dennis Arroyo, nin huli na garo ining pan-kinaban na industriya na ma serbing makina na mapa-arangkada nin mahiwasan na pag-uswag, mina-producir nin darakulang investment, dakula an value-added, asin mina-resulta sa kadakul-dakul na direkta asin indirektang trabajo asin hanapbuhay.   (GBClaveria/MMEC)

Comments (0)