Bayan-Anihan pig-implementar na sa ibang municipio kan CamSur

PILI, CamSur – Pigponan  nang  iimplementar an programang  “Bayan  Anihan” sa  ciudad  kan  Iriga  kan  nakalihis  na  semana  partikular  sa  barangay   Santiago  asin  San  Agustin.

An “Bayan-Anihan” sarong  livelihood  project na  gulayan  na  pigpadrinohan   kan   govierno provincial,  na  an  mabebenipisyohan   an  mga  residentes kan  Gawad  Kalinga (GK)  Village sa nasambit na lugar.

Sosog  sa  report  gikan  sa  Office  of  the  Provincial  Agriculturist (OPA),  sobra  sa  50ng   residentes  an  kabali  sa  sinambit nang  proyekto  na  madurar  nin  sarong  taon  an  gardening  na  saindang  pagkakasibutan.

Kapareho  man sana  kan  Farmers  Field  School  o FFS,  an  mga  participantes  nakatalaan  na  totokdoan  kan  mga  paagi  sa  tamang  pagtanom  nin  man  lain-  lain  na  klaseng  gulay,  tamang  pag- ataman  kan  mga  ini,  asin  an  mga  paagi  tanganing  malabanan  an  mga  peste  na  minaatake  sa  mga  pananom  na  gulay.

Siring  man  mga  serye  nin  lectures  asin  actual  field  demo  kapareho  kan  FFS  an  estilo  kan  training  sa  sinambit  nang  programa  na  an  lugar  na  pigtatanoman  haros  kataid  man  sana  kan lugar na pigtanoman  kan  mga  participantes  sa  FFS  on  vegetable production.

Magiromdoman  na  kaparehong  proyekto  an  pigponan  na  man  duman  sa GK Village sa banwaan  kan  Del  Gallego,  Baao,  maging  sa  municipio  kan  Nabua.

An  sinambit  nang  actividad  saro  sa  mga  programa  na  padagos  na  pigsusuportahan   ni  Gobernador  LRay  Villafuerte  katakod  kan  saiyang  programang  agricultural  productivity  tanganing  maging  suficiente  sa  marhay  na  klaseng  gulay  an  mga  namamanwaan  kan  provincia.

Nagkakapira  sa  mga  gulay  na  pigtaranom  iyo  an  pole  sitao,  pechay,  kamatis,  magin  an  lettuce.

An  training    pinapangenotan  kan Govierno  Provincial  sa  paagi  kan    Office  of  the  Provincial  Agriculturist  (OPA) na  iyo  an  minaggawad  kan   mga  planting  materials  sa  mga  participantes sa  pakikipagtabangan  man  giraray  kan  Rinconada  Movement  for  Economic  and  Sustainable  Agriculture (RINCOMESA).                                                                                                     /  LAGavino – MMEC

Comments (0)