Barangay/School Visitation sa Caramoan

Dinagsa nin ribo-ribong mga namamanwaan an ginibong pagbisita kan grupo ni dating Provincial Budget Officer  na ngonyan Vice-Gubernatorial candidate Fortunato "Ato" Peña sa Caramoan kan Sabado, Pebrero 6. Si Mr. Peña nagrepresentar ki Gov. LRay Villafuerte sa nasambit na actividad.

Enot na binisita kan grupo ni Peña iyo an Guijalo, pagkatapos nagderetso na sa Poblacion asin nagdagos sa Bikal. Sa gabos na mga barangay na pigbisita na Peña sinda nagtao nin mga food packs na maabot 4000, mga tsinelas asin school bags para sa mga elementary asin high school students labing 2400, scholarships 1581 asin nag kaigua man nin pa raffle kun sain nanao nin mga kitchen wares, plantsa, electric fan asin mga matress.
Labi-labing kaogmahan an maheheling sa mga lalawgon kan mga namamanwaan sa Caramoan sa mga asistensyang naigawad sainda kan administrasyon ni Gov. LRay kompuesto kan Linaw Mata na nagkondusir nin pagsukol  sa mga mata kan mga magigin recipientes kan mga salming sa mata, School and Barangay Assistance programs asin nagkaigua man nin Medical and Dental mission.

An sinambit nang mga actividades parte kan mga programa ni Gov. LRay na makagawad nin tabang sa mga namamanwaan na nakaistar sa hararayong lugar kan provincia. An regular na pagbisita ni Gov. LRay sa mga municipio kan CamSur an nagiging tulay tanganing mairani niya an govierno provincial sa saiyang mga constituentes asin dagos na niyang maaraman ang mga problema asin pangangaipo kan kada barangay tanganing padagos matawan nin solusyon.

Nagpaabot man nin pasasalamat an mga namamanwaan kan Caramoan ki Gov. LRay asin Ato Peña asin sa mga pagiriba sa PSSO asin Provincial Health Office sa padagos na pagtabang sainda. (lagavino/aedaño/mmec)

Comments (0)