Bagong kurso sa computer mabukas ngonian na Hulyo 14 sa SEAict kan govierno provincial

Pinapaisi kan Southeast Asian Computer Institute of Computer Technology (SEAict), sarong institusyon nin edukasyon na minamanehar kan govierno provincial sa pamamayo ni Gob. LRay Villafuerte, na an bagong kursong manonongod sa computer hardware servicing asin programming mapoon na sa Huwebes pecha 14 kan Hulyo.

An duwang kursong pig ooprecer kan SEAict madurar sana nin anom na bulan asin an graduateS kaini makakarecibe nin sertifico na akreditado kan TESDA.

An pagkakaigwa ning kaaraman asin skills sa hardware servicing asin programming iyo an “in demand“ ngonian na panahon asin makakatao nin madalian na empleo sa mga konstituentes kan provincia na nag-adal kaini.

Pig-aanunsyar man kan SEAict school administration na an enrollment para second batch kan kursong computer hardware servicing NC II asin programming NC IV bukas naman asin nakatalaan magpoon sa sunod na taon Enero, 2012.

Apuera kaini an SEAict padagos na pig-ooprecer an kursong Basic Computer Operation, Photoshop, Desktop Publishing, Autocad asin PC Troubleshooting and Maintenance asin an mga konstituentes puedeng mag-aprovechar kan mga nasambit na kurso sa Gob. LRay training programs. An mga ini Libre sana sa mga interesadong  mag-enrol.

Sa mga interesado, magduman sana sa SEAict office sa groundfloor, CamSur Trade and Investment Center, BMC Road, Panganiban Drive, Ciudad nin Naga. AnnTuy/MMEC/stn

Comments (0)