Pinakadakulang marathon gigibohon sa CamSur
PILI, CamSur – Mangayayari sa provincia nin Camarines Sur an pinakadakulang marathon sa Pilipinas na tatampukan nin mga pinakamatitibay na paradalagan sa enterong kinaban na pinangaranan Summit Water CamSur Marathon na gigibohon sa maaboton na Septiembre 26 sa Camarines Sur Watersports Complex (CWC).
An karerang ini na posibleng magin ika-duwang pinakadakulang daralagan sa Asia principalmenteng pinapadrinohan kan govierno provincial kan Camarines Sur sa irarom kan programa ni Gobernador LRay Villafuerte na gibohon an CamSur na sarong world-class tourism destination asin centro nin international extreme sports.
An CamSur iyo na ngonian an nangengenotan na provincia sa lado nin eco-tourism asin an international marathon na ini makakatabang na marhay sa pagmawot ni Gobernador LRay na i-tranformar man an provincia bilang sarong sports tourism destination.
PDCC CamSur nagtiripon katakod kan Bagyong Basyang
PILI, CamSur—Nagtiripon an mga miembros kan Provincial Disaster Coordinating Council (PDCC) ngonyan na Martes, Hulyo 13 sa Capitolyo Provincial en koneksyon kan mga preparasyon na dapat gibohon katakod kan Bagyong “Basyang”.
Si Bokal Angel Naval, Chairman kan Committee on Disaster Management, iyo an naging presiding officer kan sinambit nang tiripon.
Siring sa dati an kada departamento nagpreparar kan mga dapat gibohon sa panahon na igwa nin mga magiging biktima kan sinambit nang raot ning panahon maski ngani, base sa report kan PAG-ASA, dai man sentrong aagihan an Camarines Sur.
Sobra sa 600 na atleta maparticipar sa Triathlon na gigibohon sa CamSur
PILI, CAMSUR—Sobra sa 600 na triathletes hali pa sa maniba-ibang lugar kan kinaban kabale an mga lokal na atleta an nagrehistro na sa nakatalaan na ikaduwang Cobra Energy Drink Ironman 70.3 Philippines sa paaboton na Agosto 22, 2010.
Kaibahan sa mga nacion na ma-participar sa prestihiosong international event na ini iyo an USA, United Kingdom, Hongkong, Australia, Peru, Singapore, New Zealand, Slovakia, Czech Republic, Sweden, Ireland, Thailand, Brunei, Germany, Norway, Chile, Netherlands, Japan, Korea, France, Spain, South Africa, Iceland, Canada, Hungary, Taiwan, Vietnam, China, Switzerland, Saudi Arabia, France, Mexico, Italy asin Malaysia.
An Ironman 70.3 Philippines na-realizar sa padagos na maigot na espuersos ni Gob. LRay Villafuerte na ma-inkaminar an mga turista digdi sa provincia.
Gob. LRay, ibang opisyales nagsurumpa sa puwesto
PILI, CamSur – Durante kan nakaagi niyang duwang turno, dakula an pig-progreso kan Camarines Sur hasta ini nagin nang competitive sa ibang provincia kan Pilipinas. Naprobaran na ini poon kan taon 2004 hasta sa presente, alagad malalampasan pa kan provincia ngonian na paaboton na tolong taon kan saiyang ultimong turno an gabos na akumplisimiento kan CamSur kan nakalihis na anom na taon.
Iyo ini, sa madaling sabi, an mensaheng boot ipaabot asin ipinanuga ni Gobernador LRay Villafuerte sa mga konstituwentes durante kan pag-horar niya sa saiyang ika-tolo an ultimong turno bilang ejecutivo provincial na ginibo kan Miyerkules na aga, Hunyo 30 duman sa Convention Center kan Capitolyo Provincial sa barangay Cadlan, Pili.
Si Gobernador Villafuerte minakapot ngonian kan distinggidong honra bilang ika-duwa pa sanang gobernador kan Camarines na na-elihir nin tolong sunod-sunod na turno na iyo sana man an pinakalawig na tinutugot nin ley. An pinakaenot na gobernador na na-elihir tolong beses iyo an saiyang ama na si Congressman Luis R. Villafuerte kan bagong ika-tolong distrito na iyo man an saiyang sinalidahan sa puwestong gobernador.
|
