1st Tri King Long Distance Triathlon

Lokal na triathletes nagpahiling

gilas sa Matabungkay triathlon

PILI, CamSur – Dai man lamang nagpabaya an mga atleta sa multi-sport na ipinadara ni Gobernador LRay Villafuerte sa pan-internacional na karawat na 1st Tri King Long Distance Triathlon na ginibo sa Matabungkay Beach Resort sa Lian,  Batangas kan nakaaging Domingo, Hulyo 25.

Pinangenotan ni Benjamin Rana, Jr. asin ni Philip Atento an limang miembro kan CamSur Tri Team na ganahon an mayor na premyo sa kanya-kanyang kategoriya.

Kampante maski na nga ngani karalaban ninda labing 200 na triathletes na kinababalihan nin mga beterano asin dayuhan na mga atleta, si Raña iyo an nagkawikaw kan primerong puwesto sa grupo kan mga 18 hasta 29 anyos mantang si Atento iyo man an nagdominar kan grupong 30 has 39 anyos.

Duwa pa man na ka-team ninda an nagpa-hiling nin maray-rahay na performance, si Mark Anthony Hosana asin si Cris Dimaano na nag-surunod man ki Raña sa ika-duwa asin ika-tolo sa mga edad 18-29 tanganing ma-ripol kan CamSur an tolong pinaka-haralangkaw na puwesto sa kategoriyang ini.

An Men’s Pro kan Tri King Long Distance ginana ni Nonoy Jopson na iyo ngonian an konsideradong numero unong triathlete sa Pilipinas asin sa mga babae nag-reinar man giraray si Sandra Araullo Gonzales na duwang beses nang silver medalist sa triathlon kan Southeast Asian Games.

An CamSur Tri Team na pig-mukna ni Gob. LRay kan nakalihis na taon pa sana pagkatapos kan pinakaenot na Ironman 70.3 Philippines na ginibo sa CWC kan Capitolyo Provincial kompuesto nin mga eskuwela asin graduates kan Camarines Sur Sports Academy, sarong eskuwelahan na pig-mukna man ni Gob. LRay na mina-ofresir nin espesyal na kurikalong pan-elementarya asin high school na nakatutok sa sports, asin mga miembros kan CamSur Cycling Team, saro pa man na grupo na pig-lansar asin todong pigsu-suportaran ni Gobernador LRay.

Linalaoman ni Gob. LRay na an CamSur Tri Team mapahiling man nin arog kaini karahay na performance sa paaboton na ika-duwang Ironman 70.3 Philippines sa paaboton na Agosto 22. (GBClaveria/MMEC)

Comments (0)