Asistencia kan Capitolio sa paghanap oportunidad maka-empleo nagpapadagos
Oportunidad mag-adal asin dagos mag-empleo sa nacion Hapon nakalap
Sarong magayon na oportunidad kun sain ipinag-oofresir an libreng training asin dagos na maka-empleo sa nacion kan Hapon an nakalap kan CamSur Employment Center (CSEC) asin nakatalaan na i-ofresir sa publiko, particularmente sa mga lokal na propesyonal kan provincia.
An nasambit na aktibidad an ico-conducir sa ofecina kan CamSur Trade and Investment Center, BMC Road, Panganiban Drive, Naga City sa maabot na Pebrero 2 hasta 3, puon alas-otso nin aga hasta alas dose nin odto.
Durante kan aktibidad, nakatalaan mag-conducir nin interview asin examination an mga representante kan Advanced World Systems, Inc. sa mga aplikante katuwang man an mga personahes kan CSEC.
An mga kwalipikadong mag-sumitir kan saindang aplikasyon iyo idtong graduado o presenteng estudyante nin mga kurso manungod sa pag-adal nin computer arog kan Computer Science, Management Information System, Information Technology, Computer Engineering asin Electronic and Communication Engineering.
Katakod kan baretang ini an imbitasyon kan CSEC sa mga boot magsumitir kan saindang aplikasyon para sa nasambit na magayon na oportunidad.
Kinakaipuhan kan aplikante na magdara nin nagkapirang kopya kan saiyang comprehensive resume, kan mga grado sa pagklase, Transcript of Record asin mga retrato na may sukol na 1 x 1.
Para sa dugang na detalye, puedeng mag-apod sa mga telepono numero 4777468 asin 4775858 asin hanapon si Ms. Rodresha A. Torallo.
Libreng pag-adal nin Nihongo kan CamSur Dalan palaog sa mga industriyang Hapones
Listahan kan pig-oofresir na kurso ibinuyagyag
Padagos sa pagtao nin dalan palaog sa mga mauswag na mercado asin industriyang hapones an programa kan govierno provincial sa pagtaong libre alagad de kalidad na pag-adal kan lenguaheng hapones sa mga lokal na propesyonal sa provincia por medio kan Camarines Sur Japanese Language and Cultural Center (CSJLCC).
Dae pa sana nahahaloy kan ipaluwas kan mga administrador kan nasambit na programa an listahan kan mga kurso na i-oofresir ngonian na ralaogan kan klase sa pagpapadagos kan nasambit na programa.
An mga nasambit na kurso iyo an Preparatory/Basic Kaiwa, Level N5 Basic Nihongo, Level N4 Elementary Nihongo, Level N2 Intermediate Nihongo asin Practical Japanese Course. An nasambit na mga kurso an klasipikado como TESDA approved.
Nahase sa inisyatibo ni Gob. Lray Villafuerte, katuyuhan kan programa na ma-eliminar an kasakitan sa komunikasyon asin lenguahe na nagigin ulang asin tagulnod sa mga local na propesyonal tanganing makalaog sa mga ofecina asin lugar nin empleo sa nacion na Hapon na sarong industriyalisadong nacion.
Maroromdoman na an CSJLCC pinag-establisir sa kapusugan kan Sangguniang Panlalawigan Resolution numerado 099 como sarong programa tanganing suportahan an mga local na propesyonal sa pagtatarabangan kan govierno provincial asin kan Technical Education and Skills Development Authority (TESDA).
An pagpatala puedeng gibohon sa ofecina kaini sa Camarines Sur Information Technology Center, Capitol Complex, Cadlan, Pili, Camarines Sur o kaya sa bagong extension office kaini sa ika duwang palapag kan English Proficiency Program (EPP) Center sa BMC Road, Naga City.
Para sa dugang na impormasyon, puedeng apodan an mga telepono numero 473-0394 asin 09107022061 (FERNANDEZ/MMEC)
Libreng Animation training kan CamSur padagos sa pag-ako nin mga aplikante
Mga bakanteng slot como assistant animator hihipnuan
Padagos pa hasta ngonian sa pag-ako nin mga aplikante para sa programa kan govierno provincial manunungod sa pagtao nin libreng training sa animation sa lindong kan Gov. Lray Animation Training Program mantang pinag-extendir kaini an talaan sa pag sumitir kan aplikasyon tangani man orog na dakul mga hovenes an maka-aprovechar kaini sa laog kan provincia.
Ini an nagin lakdang kan mga administrador kan nasambit na programa sa ibong kan pormal na pagbukas kan mga klase kan naka-aging Enero 9. Ini nin huli sa nanotaran na an kakulangan sa panahon an nagin mayor na razon kun kaya dakul na mga aplikante an dae na nakalaog sa programa asin an nasambit na oportunidad sana an hinahalat kan mga ini.
Partikularmenteng boot hipnuan kan escuelahan an mga bakanteng slots como assistant animators mantang iyo ini an enot na lakdang sa pag-adal kan animation asin masunod digdi an training como animator.
Ngonian na ralaogan sa klase, 35ng slots an ipinagtalaan para sa assistant animators mantang 16 na slots an ipinagtalaan para sa animators asin an nasambit na mga bilang an ma-componir kan ika-17 batch kan assistant animators asin ika – 9 na batch kan animators respectivamente. An gabos na trainees maricibe nin transportation allowance.
An screening ginigibo sa CamSur Animation Studio, Provincial Capitol Complex, Cadlan, Pili, Camarines Sur.
An mga interesadong mag-aprovechar kan programa puedeng mag-apod sa telepono numero 4754802 asin 4730546 para sa dugang na detalye kan programa .( FERNANDEZ/MMEC)
Gob. LRay, opisyales kan CamSur nagbirisita sa Sipocot
PILI, CamSur – Rinibong residente asin mga local na lideres an nagsarabat ki Gobernador LRay Villafuerte na kaibahan an magkapirang opisyal kan provinciang nagbirisita sa banwaan nin Sipocot asin Pamplona sa padagos na pagtulod kan School and Barangay Visitation program.
An School and Barangay Visitation program sarong mekanismo na piglansar ni Gobernador Villafuerte puon pa kan enot siyang magkapot kan renda bilang ejecutivo provincial tanganing lalong maparani an lokal na govierno sa mga tawo.
Kaibahan ni Gob. LRay an saiyang matuang aking si Migz, sinda Vice Gov Ato Peña, Bokal Romulo Hernadez, Darius Nopra asin Domingo Briones pati na mga personahe kan Capitolio.
Siring kan dati, nagdistribuir an mga bisita nin mga food packs, school supplies asin mga sapatos para sa mga kaakian asin nagpakunsuwelo man sa tawo sa paagi ni pa-raffle nin duwang TV sets, mga electric fan asin pan-harong na mga kagamitan.
Nakipag-olay man an mga taga-Capitolio sa mga lideres kan banwaan asin barangay tanganing aramon an saindang mga problema asin pangangaipo, na kun puwede sana man imedietamente niyang tinawan solusyon o kasimbagan.
Nagpresentar man nin magkapirang entertainment numbers an kaibahan nindang mga miembro kan Bicol Heritage Group and LRay Dancers.
|
