Survivor USA nakatalaan i-shooting sa Caramoan sa maabot na Marso

PILI, CamSur – Mayo nang kaduda-duda na gantad nang marhay an popularidad kan  Gota Village Resort asin parilibot kaining magagayon na lugar sa Caramoan na lakop na sa enterong kinaban.

An mga isla na hararani man sana sa Gota Village Resort nagi nang paboritong shootingan nin magkapirang serye o episode kan sikat na reality show na Survivor na naka-prankisa sa maniba-ibang nacion.

Bago pa sanang bukasan an Gota Village Resort na saro sa mga flagship projects sa irarom kan pan-turismong programa ni Gobernador Lray Villafuete, entero ining inukopar  tanganing istaran kan cast asin crew para mag-shooting kan pinaka-enot na episode kan Survivor France na pinangaranan Koh Lanta: Caramoan kan Mayo, 2008 na pinaluwas sa mga mayor na TV network sa Europa na nagkahiriling nin milyon-milyon na paradalan.

Biglang luminangkaba an popularidad kan Caramoan, mala ngani kan taon na idtong 2008, an Gota Village Resort napili kan Top Resa Paris, an pinakadakulang tiripon nin mga negosyante na imbuwelto sa turismo asin pag-biyahe sa Europa, bilang number one eco-tourism destination sa kinaban.

Surunod-sunod na  poon kaidto an mga serye nin Survivor na naka-prankisa sa iba-ibang nacion, mala ngani ta hasta ngonian sarong dosenang season kan Survivor an pig-shooting sa Caramoan.

Pagkatapos sana kan Koh Lanta: Caramoan, suminalida sa pag-shooting an Survivor Israel kan Abril 2009, asin nagsurunod na man an Survivor Bulgaria kan Hulyo, 2009, Survivor Serbia July, 2009, nag-balik an Survivor Israel kan March 2010, nag-otro shooting nin saro pang episode an Israel pag Mayo, 2010, suminunod an Survivor Norway kan Hulyo 2011, suminalida an Surivor Belgium pag Mayo 2011, suminabot an Survivor Sweden kan Hulyo 2010, nag-balik man an Survivor Serbia kan Agosto 2010, nag-shooting man an Survivor Denmark kan Hunyo 2011, asin pinaka-huring nag-shooting duman an Survivor India na uminabot kan Agosto 2011.

Ngonian na Marso, an orihinal na Survivor USA na mismo an nakatalaan na mag-shooting sa Caramoan.   Nin huli ta halos gabos nang prankisa kan popular na reality show na Survivor nakapag-shooting na digdi, an Caramoan bantugan na ngonian na apodon Home of Survivor.

Kasuodmang Lunes, Enero 16, nagduruman sa Caramoan an mga personahe kan Capitolio tanganing  mag-interview asin magkalap nin dagdag pang empleado para sa operasyon kan Gota Village Resort asin tabangan an mga producer kan Survivor USA nin mag-hanap nin mga kaipuhan na empleado  arog kan crew, helpers, housekeepers, drivers, production staff asin motorboat operators.

Maabot sa sanribong mga residentes an nag-apply nin trabaho asin an mga makukua makakapagtrabaho nin maabot sa anom na bulan.

Apuera sa ingreso minahali sa turismo, an tourism program kan provincia dakulang tabang man na matawan opportunidad sa empleo an mga taga-CamSur.  (GBClaveriaMMEC)

Comments (0)