Pamayo kan tolong darakulang telebisyon sarabay na bisita sa 22nd AdCongress Phils.

PILI, CamSur – Sarong signipikanteng kabtang sa istorya kan industriyang telebisyon an sinurat kasubago kan an mga pamayo kan tolong mga higanteng network sa nacion na sinda Atty. Felipe L. Gozon kan GMA 7, si Manuel V. Pangilinan kan PTV 5 asin si  Eugenio “Gabby” Lopez III surunod na magsarakat sa entablado durante kan programa kasubagong aga tanganing iheras as saindang mga kaisipan asin sentimiento manunungod sa presenteng kamugtakan pati na man an futuro asin padumanan kan industriya.

Haros sararo an mensahe kan tolong mga pamayo nin telebisyon – marikas ngonian na pagbabago sa industriya nin telebisyon nin huli kan padagos man na mga bagong developments sa lado nin digital technology na lalong mapatingkad asin mapakusog kan influwensiya kan telebisyon asin iba pang mga digital imaging gadgetry arog kan ipad, cellular phone asin kan internet mantang lalo man na nagdadakul na parte kan populasyon an oro-aldaw nagigin imbuwelto digdi.

Segun pa ngani ki Atty. Gozon, lalo pang magiging dakula an impluwensiya kan TV sa mga tawo nin huli ta an TV iyo pa man giraray an pinakabaratong klaseng entertainment na direktang konektado sa mga tawo ngonian na panahon na halos 94 por ceinto na kan kaharungan sa Pilipinas ngonian igwa nin telebisyon.gayong.

Sabi pa kan mga lideres kan industriya na nin huli kan nagkukusog na impluwensiya kan TV sa tawo dara nin marikas na progreso sa digital technology, dapat man na aprovecharan ini kan mga stakeholders sa TV industry sa paagi nin pag-tratar kan mga bagong challenges bilang mga opportunities, alagad dai man paglingawan na an mga oportunidad na ini maninigo sana man na pakinabangan nin kasabay na responsibilidad, nin huli ta kada tawong magsangat nin inpormasyon para sa publiko sa arin man na platform, maski na sa facebook asin iba pang makabagong teknolohiyang gadgetry, responsible kan impormasyon na saiyang itinao.

Risadong magayonon an naging impact kan tolong bisita sa mga tawo, lalo na ta risa man na maski na ngani sinda tunay na magkaka-ribal o enemigo mortal sa negosyo, sinda mga tunay na mga professional asin mag-aramigo pa ngani an pagtrato sa kada saro.

Padagos man giraray an maiba-ibang exhibit sa exposition hasta sa aga, mantang ngonian na hapon an tema iyo an Nutrition, Health and Wellness sa pagpapadrino kan Nestle, Philippines, How Cool Brands Stay Hot na pangengenotan ni Jori Van den Bergh kan InSites Consulting, The Language of the 21st Century na ididiskurso I Mark Tussei, an chief creative officer kan Leo Burnett Worldwide, asin an panhuring tema na iyoan Print Media: A Valuable Component in Any Engegement Strategy Expecially with Multi-Platform Approach, ni Geoff Tan, an senior vice president kan Singapore Press Holding.

Dakul pa man na mga aktibidad an nakalinyada paras a aga, na pangungultimohan kan pag-distribuir kan Araw Awards sa pagkabanggi. (GBClaveria/MMEC)

Comments (0)