Guijalo Port sa Caramoan padagos na an pag-irahay

PILI, CamSur – Pinonan pa kan ultimong semana nin Deciembre kan naka-aging taon, padagos pa ngonian an pag-irahay asin lalo pang pagpa-karhay kan Guijalo Port sa banwaan nin Caramoan.

An Guijalo Port na nadanyaran kan duwang magkasunod na Bagyong Bebeng asin Chedeng kan Mayo 2011, sarong importanteng facilidad na dakula an kontribusyon sa programang pan-turismo kan govierno provincial, asin inaagihan kan sarong mayor na dalan tanganing makapag-biyahe paduman asin hali sa magkapirang kostal na banwaan pati na man kan islang provincial nin Catanduanes.

Nanotaran an pangangaipo kan pagpakarhay kan Guijalo Port durante kan sarong pag-biyahe ni Gobernador LRay Villafuerte sa lugar, kun sain nahiling niya mismo na dakula man nanggad an destroso sa dakulang parte kan pantalan na bako sanang nakaka-atraso sa opersyon kan port kundi delikado man sa mga biyaheros duman.

Pinagmarhay ni Gobernador Villafuerte na tawan prayoridad an pag-irahay kan pantalan, mala ngani na maski na panahon nin Pasko hiningoa niyang makipag-pakiolay ki General Manager Juan C. Sta. Ana kan Philippine Ports Authority tanganing makahanap fundo para sa pagpa-irahay asin masuwerte man na asikasuhon tulos kan PPA an saiyang kahagadan.

Dai pa ngani natatapos an Deciembre, bako sanang na-pondohan man tulos an proyekto kundi an patrabaho imedietamenteng man tulos na naponan.

Padagos ngonian an pag-irahay asin linalaoman na matatapos an pag-rehabilitar kan Guijalo Port antes pa man mag-abot an summer kun nuarin linalaoman na mas dakul an mga biyahero asin bisita an magamit kan pantalan. (GBC/MMEC)

Comments (0)