Govierno provincial nagtatabang sa pagpa-asenso kan industria nin Abaca

An  Abaca  Nursery  project kan provincia nin CamSur na namukna sa inisyatibo ni Gob. LRay Villafuerte sa katuyuhan na makatabang sa pagpa-asenso kan industria digdi sa provincia,  ngonian nakakatao na nin benepisyo sa paagi nin pagbariwas nin mga pantanom na abaca.

Halangkaw ngonian an pangangaipo sa pan-kinaban na merkado kan  abaca na puedeng makahase nin manlaenlaen na produkto arog kan darakulang pan-gakod, sa pag-gibo nin de kalidad na papel, handicrafts asin iba pang gamit.

Kadakol ngonian na mga importer o parabakal na mas pinipili an abaca kaysa synthetic fiber nin huli kan kahaditan kan epekto kan synthetic material sa kapalibutan o environment. Nin huli kaini an abaca iyo na an produktong nag-sisikat sa pan-kinaban na merkado.

An govierno provincial igwang duwang abaca nurseries sa mga banwaan nin Caramoan asin Presentacion na ngonian kadakol nang tambu  na puedeng makoanan  nin pantanum.

Mala ngani  sarong NGO asin sarong LGU an nakapag-aprovechar na kan mga pananum na hale sa duwang nurseries kan provincia. An nakakoa kan pantanum iyo an LGU kan Del Gallego na saindang gustong ikultivar asin padakolon. An banwaan nin Del Gallego participante sa convergence program kan provincia. Mientras, an saro pang NGOng ACF nag-aprovechar man kan pantanum para  ibariwas sa mga project beneficiaries kaini sa banwaan nin Balatan. MMEC

Comments (0)